بولبول یوواسی
قیرمیزی آجی بی بار لارین توزونو ، اُووجونان آغزینا تؤكولدویو و گؤزلرین دن یاش سوزوب هارای تپه رك ، دیل و دوداغی نین یانیب توتوشماسینی هله اونودمامیشدی. هابئله اود اوستونده داغ لانمیش بیر قاشیقین اَلینه باسیلماسی و قابار چالیب یارا قویموش دریسینی كوچه ده كی و مدرسه ده اولان یولداش لاریندان هفته لر له گیزلت مه سی اونون اوشاقلیق دان یادیندا قالان خاطیره لر ین بیر دامجی سی ایدی. هابئله مدرسه یه چاتماق اوچون گئجیشمه سینه گؤره و چئشید لی باهانا لارلا یوخسول لاری آدام یئرینه قویمایان مودیرین گیلانار آغاجی نان اونو و باشقالارینی دؤیمه سی ، دوز كیمی بیر یارانی آجیشدیران آجی ایدی كی ایللر ایدی هله یادینا دوشدوكجه بَدَنی نین توك لرینی اَسدیریر دی.
اوزامانلار دوققوز باش ایدیلار . آتا آناسی و باجی قارداشلاری نان آغاجی كَردی سی اولمایان ایكی اوتاق لی كیچیك بیر ائوده یاشاییر دیلار . اوشاق لارین خوش گونو كوچه بازار دا كئچسه ده ائوه ییغیشجاق ، اوره ك لردن و گؤزلردن سئویج ایله محبت داشیردی. قاپی قونشونون اوشاقلاری نان چؤله باییرا چیخماق اونون او دؤوره ده بؤیوك دیلخوش لوق لاریندان ایدی. قَلَمه آغاجلاری نین اوستونده قازیلان یازیلاری اوخوماق و هردن ده اوستالیق لا آغاجلارین قابیغیندا چكیلمیش اخلاق سیز شكیل لر اونو دوشوندورسه ده قومار بازلارین های كوی لری و اونلارین كئفلی – كئفلی اودوب اودوزمالاری و سونرا دوروب یاخالاشاراق آنا باجی یامان لاری ، اونون و یولداش لاری نین اَن اَی لن جه لی و كئف چكمه لی لحظه لری ایدی. خوروز باز لارا باخماق و ایت بوغوشدورانلاری ایزله مه یین ده باشقا بیر لذتی وار ایدی. هردن كوچه ده تور قوروب والیبال اویناماق و باغلاشاراق آیری كوچه لرین تیم لری ایله فوتبال یاریشمالاری دا آز اولموردی.
آنالارین قولاق لاری دینج اولسون دییه اوشاقلارینا چوخ باش قوشمازدیلار .آنجاق بو آرادا قیزلار دا وارایدیلار كی كوچه یه چیخمالاری عاییب ساییلاراق ، هردن ، بیر قونشونون ائوینه ییغیشیب ایپ گئتمك ، خسته كین اویناماق ، توپ عربی ، گیزلن پاچ و یئرده قالان قورد اولسون اویون لاری نان تعطیل لرینی و یای یازین اوزونلو گونلرینی آخشام ائدیردیلر.
شَهَر لرینده اوچ سینَما اولسادا ، سینَمایا گئمه یه پول ایستیردی كی بیر پارا اوشاق لار مجبور اودولار دده لری نین جیبیندن پول اوغور لاسینلار و یادا مثلا اونلاری سوت آلماقا یوللایاندا بیر آز سوتو آز آلیب قالانی نا سو قاتسین لار . البته بو اَیری ایش لرین و گیزلینجه سینَمایا گئتمه یین بیلین مه سی نن بی بار دادماق و گئجه نی شام سیز یاتماق حتمی ایدی. داملاردا هله آنتن اولماییب تلویزیونون ائولرده یئری اولمایان گونلرده سینَما لاردا ایینه سالماقا یئر اولمازدی. آدامی هردن سینَمایا گئتمك دن او قَدَر قورخوداردیلار كی قارانلیق سالونا گیردیك ده كَمَرینی بیر داها لازیم اولمادان بَرك باغلاییب یان یؤوره سینه دیقّت ائده ردی .
ساویشان عؤمرون دن بئینین ده قالمیش و اونو تك قویمایان بو صمیمی خاطیره لر له یاشاماق لا ، بیر گون هوس ائتدی چؤله چیخماغینان آزجادا اولسا حؤوصله سی آچیلا . " قودوق بوغان " چایی گور هاگور آخیب داشیردی و لیل لی سولارین گتیردی یی یاستیق یورقانلار و باشقا ائو اَشیالاری گوجلو بیر سئلین فلاكتینی آنلادیردی. چایین كناریندا صفالی بیر یئر سئچیب دینجه لر كن گؤزو اوجا بیر قَلَمه یه ساتاشدی كی بیر بولبول اونون بوداق لاریندا یووا قوروب شن نغمه لرله طبیعتی روحلاندیریردی.
چای ،جوشغون لوغو و داشقین لیقی لا اونو بولوغ دؤوره سینه گؤتوروب بیر تیراكتور لا " آغ چای " دان كئچدی یی یاز گونلری نین بیرین یادینا سالدی . كندلی بیر دوستونا قوناق گئدیب آرازا یول دؤین او چای دان بالیق توتما گونلری و ایلك دفعه اولاراق كند یاشامینی تجربه ائتمك و یولداشی نین یالان دان دوغوردان تعریف له دی یی جینسئل ایلیشگی لری ائشیتمك خوشونا گلسه ده شَهَره قاییتدیقدا بوسبوتون دییشیلمیشدی و بیر پارا تجربه لری و حیس لری گرچك حالدا یاشاماق ایستیردی. بو اوزدن ایسه ایسته ر ایسته مز بیر گون " گوللو بولاغ " طرفینه یولا دوشوب دره نین تركینده كی كولوخ لاردا دولاشان فاحیشه لرین بیرین نظرده آلیب چوخورا یئندی. آنجاق اونو و اؤزونو چیپلاق حالدا گؤردوك ده بوتون دویغولاری ایضطیرابا چئوریلیب تئز گئئی نیب قاچدی و سیرا داكی لار اونا گولوب " گئت بالا هله آغزیندان سو ت اییی گلیر " دئمك ایله او دالا باخمادان یئیین لیك له یوققوشا دیرماشیب " دبّاغ خانا " اوستون دن گئتدی مجسّمه یه ساری كی اوردا چمن لر اوستون ده اوزاناراق بو به باشارتدیغین و تانیش اولمادیقی بیر هیجانین نه اولدوسونا فیكیر له شه. سونرا سَرو آغاجینا دایانیب " شاه " ین مجسّمه سینه باخاركن ، اونودا گوله رك گؤردو . آجیغیندان شاهی داشا توتوب گؤتورلن سه ده پاسیبان لار اونو " قوشا باغلا ر" ا جان قووالاسالاردا توتانمادیلار . هاننان گئژدن قاییداركن بوتون جینسئل دویغولارینی بیر آن ایچره ایتیر مه سی بیله سینه غریب گلدی. قودوق بوغان چایی نین " بوغما " آدلی بیر بالاجا گؤلو وارایدی كی پالتارلارین سویونوب تونوكه قاتینا اورا بیر شیرجه ووردی. گونشین ایستی سیله جانینی قوروداركن گئیی نیب ائوه یئتیر ه نه جك اذان دئییلیردی. گئجه نی چوخ دوشونسه ده سینمیش غورورونو جوبران ائتمك ایستیردی. اؤزونو ایثبات ائله مك و كیشی لی یینی بیر داها یوخلاماق اونا اَن بؤیوك بیر آرزو كیمی ایدی. بونا گؤره ده صاباحی یئنه دره یه یئنیب همان قادین لا بیر داها گؤروشمك ایسته دی. اؤزون دن هئچ اولما سا اون بئش یاش بؤیوك اولان " گؤزل " آدلی او قادین پولونو اوّل ده آلیب بیله سینه گوله رك " تكجه اون دقیقه واختین وار " دئدی.
آمما او بو دفعه ، كیشی لی یینی بئش دقیقه چكمه دن ثابیت ائدیب غرورلا دره نی ساللانا – ساللانا یوخاری چیخدی. اونو گؤره نلر " طرف نه جور ایدی " دییه رك بیله سینه آنلاتدیلار كی باشینا ایكی تومن بؤرك كئچیب دی.
دولغون گؤزلری نن دَییشیلمش یوللاردان كئچیب قودوق بوغانا چاتینجا بوتون باغ باغا تین خییابانلارا و ائولره چئوریلمه سی اونو اوز ه ركن كئچمیش دن قالمیش گؤزونه دَیَن تكجه آشینا ، بیر اؤزو ایدی و بیر ده گؤی اوزه ری نین داغیناق بولوتلاری. بو گونو آخشام ائله مك ، بیله سینه اَن قورخولو كابوس ایدی و بو گونه جان هئچ واخت گؤیلو چكدی یی كیمی یاشام ایذنی اولما ماسی و اَل قولون باغلایان گؤرونمز زنجیر لر له هم مه شه اؤزونو توتوقلو حیس ائتمه سی، اوندا بیر قوش كیمی یاشاما ق نیسگیلی یاراتمیشدی. آرزو ائدیردی بیر بولبول سایاقی سئحیرلی نغمه لری له بوداق دان بوداقا قونوب یورولدوقدا ایسه یوواسیندا دینجه لركن روزی سی دیم دی یینده آزاد بیر حیات سورمه یین دادینی چیخاردایدی. كیمین یانیندا نه جور دانیشماق قایغی سی و چوخ سؤزلری دیله گتیر مه مك ایجباری ، اونو گئرچك وارلیقینا غریبه ائدیب هم مه شه اؤزون یالانلار و یانلیش كلمه لر و قیلیق لار دالیندا گیزلت مه لی اولموشدی. بولبول یوواسی یوكسك لرده گؤزه دَییب ، دیق قه تینی چكسه ده آزجا سونرا سویا باخیب بوش بیر بئشی یین دالغالار لا پَنجه لش دی یین گؤردو . بئشیك چایین كناریندا كؤتوك لره و كول لارا ایلیشیب سویون آخارینان گئده نمه یینجه بیر آن اولورسا آناسی نین لایلا لاری یادینا دوشدی كی دمیر بیر بئشی یی ییر قالاركن قوش یوخولو كؤرپه لری یاتیرتماق ایسته ردی و اونوتمامیشدی كی آناسی بیر گون دئدی :
" بولای لایی سنه دئسه یدیم ایندی سن چوخ دان ایدی یوخویا گئتمیشدین . "
بولبول یوواسینی یاخین دان گؤرمك اوچون ، نه قدر چالیشسادا ، آغاجا چیخانماییب زویولتونن یئره دَیمه سی چوخ چكمیردی. قاش قارالیب گونون باتماسیندان سئوینه رك حیس ائتدی یئنه بیر گون داها ، یاشاماقی باشارمیشدی. قارانلیقی ایشیقلاندیران چیراغ لار شَهَرین كوچه خییابانلاریندا ، اونا یولونو تاپیپ ائوه قاییتماق ایمكانی یارادیرسا دا هر زاد دان چوخ گؤزلویونه بوشلو ایدی كی اون سوز بیر هئچ ایدی. یورقونلوق دان بیله سینی شیرین یوخو آپارسادا آییلدیقدا گؤردو یئنه هله سحره قالیری. ائو ده تك ایدی و ایللر ایدی بیر محكوم كیمی بو یالنیز لیقی چكمه لی ایدی. عائیله سی یورد دیشیندا باشقا بیر اؤلكه ده یووا قوروب یاشا سا لار دا ، اونا مملكت دن چیخماق ایذنی وئریلمیردی. او قَدَر دؤولت اداره لرینی گزمیشدی كی آخیردا آیاق دان دوشوب بو یاشام طرزینه اؤزونو عادت وئرمیشدی. اوبیر گون كیشی لی یینی و سینمیش غورورونو دقیقه لر ایچره اَله گتیرسه ده ، ایندی دوز اون اوچ ایل ایدی كی قیریلمیش اینجه بیر چینی گولدان كیمی اُوولوب هر پارچاسی بیر یئره داغیلمیشدی و اونلاری ییغماغا بیر همّت گؤستر میردی.البته داها بازاردا دا قدیم لر كیمی بیر میخ چی كیشی قالمامیشدی كی چینی لرین تیكه سینی یان یانا دوزوب میخ لا ماغینان اونلاری كئچمیش حالینا قایتارا . او چوخ قدیم لرده قیشین لاپ شاختالی بیر گونون ده ، جانینی قیزدیر ماق ایسته ركن یول اوستونده كی بیر حیزبین دفترینه گیریب چای ایچه ركن ، دئمه گینه او دقیقه لر ایچره رادیودان دؤوله تین كودِتا ایله ییخیلماسینی ائشیده ن جماعت كی سویو دا پوفله یه – پوفله یه ایچمك عادت لری ایدی فورصت دن یییه له نه رك تؤكولسون لر او حیزبین دفترینه و اوردا كی لاری اَزیب دؤیه ركن آت داشقالارینا باغلاییب خییابانلاردا سوروتده سین لر . بونو دا یاخین قوهوم لاردان بیری تَهلوكه دن قورتاراركن سونرالاری توتوقلادیرو بئش دقیقه قیزیشماغا خاطیر بئش ایل تامام حبس یاتیر و آدی بیر لیسته كئچیر كی مملكت دن چیخما حاققی اولماییر.
اوزامان شَهَرده تكجه بیر رادیو وارایدی كی اونودا بعضی واختلار بیر مئیداندا ایشه سالیب جماعت مملكت ده و دونیادا اوز وئره ن حادیثه لری ائشیده ركن نه تَهَر دانیشما لارینی و كیم لری نن دوست اولوب اولمادیق لاری حاققیندا قرار وئره ردیلر .
سحره جان بؤیرو اوستونده یاتاق دا ائشین سه ده صوبح اولجاق یئنه بیله سینی قورخو گؤتوروردو .ایشیق لیق اونو او قَدَر قورخودوردو كی حتتا معلیم چی لیك وظیفه سی داشی یان گونلر ده هئچ واخت " ایشیق " كلمه سی دیلینه گتیر مه میشدی. نییه كی هر ایشقین آردیندا اولان قارانلیق لار او نو دِهشته و وحشته سالیردی.
توز باسمیش كیتابلارینا گؤزتیكه رك " علویه خانم " كیتابی ، آناسی نین آدینی خاطیرلاداراق اونواوره ك دن آغلاتدی. اوقَدَر آغلاتدی كی بیر زامان گؤردو گون لاپ چیتداییب دیر . تئز تئلفون آچیب بیر یوك داشی یان وانت ایسته ركن حَیَط ده كی دؤرد مئتیر لیك نردیوانی ماشینین دالینا قویوب دئدی سور " قوتور " یولونا . قودوق بوغان چایینا چاتینجا سوروجونون حاققینی اؤده ییب دونن كی آغاجین یانیندا ، ماشینی ساخلاتدیریب نَردیوانی یئندیردی. سونرا بیر آزجا اونو چكیشدیریب گؤزدن ایته ركن نَردیوانی دایادی قَلَمه آغاجینا . نَردیوان آزجا لاخ شَح اولوب تیتره ییب دَبَشسه ده اؤزونه آلمادی و یوخاری چیخدیقدا اوره یی چیرپینان آمما قویوب قاچمایان بیر بولبول گؤردو كی یوواسین دا اوتوروب تَزه یومورتادان چیخمیش بالاسینی قوروماغا چالیشیردی . اونون بو محبتی نه و قورخماز ایراده سینه حئیران قالاراق غوربت ده یاشایان بالالارینی یادا سالیب دویونجا آغلادی. او كی آرزو ائتمیشدی ائوی نین دِكور لو كومودونا بیر بولبول یوواسی قویماق لا ، حیاتینی عاطیفه عطری له دولدورا بیردن بیره بو ایش دن واز كئچیب نَردیوان پئرته رك اونودا كلّه ماغاللاق یئره ووردی.
گؤزلری قارالمادان و چاپیلمیش باشی نین قانی هله بوسبوتون قورومادان ، سولغون یاناقلاری له گولومسه ركن قلبیندن كئچدی كی داها كیمسه دئمه یه جك " یاشار كیشی " نی قودوق بوغان بوغدی. اؤلومو حیس ائدیب ووجودی اَسمه یه دوشه ركن گؤزو چایین كناریندا كی دالغین بئشی یه دوشوب بولبولون حزین نغمه لری له آغزین دان قیرمیزی بی بارلار پوسكوروب آه دئمه دن جان وئردی.
نَردیوانی دا اَكینچی لر چایین اوزه رینه قویوب سینیب داغیلاناجان اوتای بوتای آراسیندا كؤرپو ائتدی لر.
LinkBack URL
About LinkBacks
Reply With Quote