Mövzu: آنا شعرلری بو تاپیک ده یازین

هامیمیز آنانین جایگاهین بیلیریخ بو تاپیک آنالار اوچون آچیلیر و بوردا آنالار حاقیندا یازیلان شعرلری بیر یئره ییغاجاییخ

آنالار حاققیندا هرنه دئساخ آزدی

یاشاسین بوتون گوزل آنالاریمیز

آنا

حیاتین دولاشیق لحظه لرینده،
عؤمرومه داغ کیمی دایاقسان آنا !
ظولمت لر اؤنومده آت چاپان زامان،
یولوما نور ساچان چیراقسان آنا .

لقمان شفالیدیر قیزغین نفسین،
سیغماز بو دونیایا عشقین، هوه سین .
دردیمه درماندیر آنالیق سسین
سن منه مقدس اوجاقسان آنا .

هر داملا دیله یین بیر بؤیوک ده نیز،
محبتین تمیز، ایسته یین تمیز،
سن منه عزیزسن، من سنه عزیز
دیلک سماسیندا شافاقسان آنا .

آلقیش کؤنلونده کی پاک نیتینه،
سؤز - صحبت یئتیشمز علویتینه،
کائنات مات قالمیش محبتینه
حیاتی ایسیده ن قوجاقسان آنا .

آنالی گونلریم چیچکلی باهار،
آناسیز گونلریم کدرلی غبار،
دنیادا آنادان مقدس نه وار؟ !
جسمیمه جان وئره ن نووراقسان آنا .

ایستک ده نیزیدیر جوشقون اوره یین،
ائولاد سعادتی آرزو - دیله یین .
سن تک مقامی وار هانسی مله یین؟ !
کیم دئییر ملک دن اوفاقسان آنا .

سن منی باغرینا باسدین جان کیمی،
آخدین اوره ییمه ایستی قانکیمی .
غرق اولسام غملره بیر یئلکان کیمی
منه یول گؤسته ره ن مایاقسان آنا .

بیلمیره م، قلبیمده آخان قان میسان؟
سن منه جسمیسن، یوخسا جان میسان؟
سؤیله ملک میسن یا انسان میسان؟
یوز بئله سؤزلردن قاباقسان، آنا !

من سویوق ده ی مه دن دوشنده خسته
دردین منه گلسین ! – دئدین، آهسته .
هر زامان گؤز آچدیم، باشیمین اوسته
گؤردوم نیگرانسان، اویاقسان آنا

خیرالله حق بیگی « ساپاق »

آنا

اي يامان گونده چاتان هر زمان امداده آنا!
اي حياتيم بويو دونياده يئتن داده، آنا!
ياتارام هر گئجه من فيكر و خيالينله سنين
گوره رم گول اوزيوي هر گئجه روياده آنا!


جان ائوينده نئچه آي چكدين آنا زحمتيمي
ياتماييب صبحه قدر، هي چكيبن ذلتيمي
سود وئريب كورپه ليگيمدن گوروبن محنتيمي
وئردين اولادين اوچون عمريني سن باده آنا!

منه روزي ائله دين جان شيره سين قانين ايلن
مين جوره نازيمي چكدين باش ايلن، جانين ايلن
ياتمادين، لايلا دئدين سن حزين افغانين ايلن
آغليان دمده يئتيشدين نئجه , فرياده آنا!

صبح تئزده ن اپوبن سن مني بيدار ائله دين
اوزومه گولدون آنا! عالمي گلزار ائله دين
منه اوز وئرسه كدر,سن اوزيني زار ائله دين
اي اولان جمله مشقتلره آماده آنا!

گر مريض اولسام آنا!جانيني قربان ائله دين
اوزده گولدون,غميني سينه ده پنهان ائله دين
يئتيريب حد كماله مني انسان ائله دين
تئز قوجالتدين اوزيني سن بو تمناده آنا!

بويودوم منده بوگون يار هوادارين اولوم
دولانيم باشينه من همدم وغمخوارين اولوم
خوشدير عمرين بويو,گر يارو پرستارين اولوم
نه ضرر گلسه منه خوشدو بو سئوداده آنا!

آنالار بايراميدير منده سني ياد ائله ديم
بو حقير تحفه م ايله قلبيني دلشاد ائله ديم
سني گوردوم اوزومي غصه ده ن آزاد ائله ديم
مسكنين دائم اولا جنت اعلاده آنا!

نه قدر تعريف ائده م آزدير آنا!حرمتيوي
حقيوي سعييني ,ائولاده چكن زحمتيوي
خالق آرتيرسين اوزو عزت ايله شوكتيوي
هم بو دنياده و هم عالم عقباده آنا!

بو شعری من اول بار گؤرنده گؤزومون یاشین ساخلایانمادیم چوخ گوزلدی دوز منیم احوالیمین وصفیدی

یاشاسین بو شعرین شاعیری ( عشق اولسون )



آنا گؤروشو



گـــــئجه گؤردوم یوخودا شهر چراغــــــان اولدو

گـــــــؤردوگوم یــــــــئر،نظریمده یئکه میدان اولدو


گؤرمــــــه میشدیم من او میدانی باخیردیم،بیردن

آنامـــــــــین قامــــــتی میــــــــداندا نمایـــــان اولدو

نئــــچه ایلدن سورا گؤرسندی، ایشقلاندی گؤزوم

یــــــئتیشیب روحــــــو، منیم روحوما مهمان اولدو

آنامـــــــــین روحـــــــو منیم روحومولا بیرلشدی

ائــــــله بیل بیر دانــــــــا جسمیمده ایکی جان اولدو

چوخ سئویندیم اونو گوردوم اوره گیم چــیرپیندی

والـــــــه اولـــدوم، اودا گؤرجک منی شادان اولدو

دئـــــــدیم ای گـــؤزلریمین نورو آنا! هاردایدین؟

غــــــم هــــــــــجرینده اینان کی اوره گیم قان اولدو

اونـــدا کی سن واریـــــدین آنلامادیم قدریوی من

ســــــن گئـــــــده نــــدن سورا دنیا منه زندان اولدو

ده گـــؤروم توختـامیسان، ایندی یئرین راحتدیر؟

دوداغــــــی قاچـــــدی باشین توولادی خندان اولدو

گــــؤزلریـن تیکدی منـــــــه حســـرتیله آه چکیب

پـوزولـــــوب حالــــــــــــی قهرلندی، پریشان اولدو

دئــــــــدی: من راحــــــــتم! آمما نــگرانم سنده ن

ســــــؤزو آغـــزیندا ،دولوب گؤزلری گیریان اولدو

آغـــــلایا - آغــــــلایا دؤنــــدو ابــــــدیت یولونا

یـــــولا دوشــــــــــدو او قدر گئتدی کی پنهان اولدو

قــــیشقرانـــدا: آنـــــا گئتمـــه منی یالقیز قویـــما!

هـــــاراییمدان، یوخودان جمـــله هـــراسان اولدو

آییلاندان سورا گؤردوم کی گئدیب یوخــدور آنام

وصل رؤویـــــاسی قوتولـــــدو یئنه هــــــجران اولدو

قبر ائـــــوینده اؤلـــــــولرده نــگران دیر بیزده ن

فلــــــــکین چــرخی چونوب گؤر نئجه دوران اولدو

منــــی دؤنیاده هئچ آرواد سئوه بیلمز آنــــــا تک

بیـــــر دانایـــــدی آنــــام، افســوس اودا بیجان اولدو

یادینا جمـــــــــعه گؤنـــو دوشدو«سخا»نین آناسی

بـــــاشلاییب بو غـــــــــــزلی یازدی غزلخوان اولدو


حمید «سخا» مهر تبریز

تقدیم اولسون بوتون آنالارا و دوزلو اوغلانا و بوجور بیر اولادلارا.یاشاسین والله...

منیم آنام باش باغلار
باشی یوار یاش باغلار
گاه منی دیئه ر آغلار
گاه باغرینا داش باغلار.....

آنالار گونون بوتون گوزل آنالارا تبریک دییرم

اومودوم وار همیشه ساغ قالیب شاد یاشاسینلار

آنالار گونو قوتلو اولسون

اوشاقلیقا من دؤنمک ایستیرم

یئنه آنامی اؤپمک ایستیرم

هر گون سحرلر داراق اَلیمده

اُو ساچلارینی هؤرمک ایستیرم

تئل گوللرینی باشینا بیر بیر

ساغا سولا من دوزمک ایستیرم

محبت لی او ناز قوجاغیندا

بالیق تکین من اوزمک ایستیرم

یاپیش الیمدن گئداق دؤلاناق

یالنیز سنیلن گزمک ایستیرم

منه دوموش توت قوی آغزیما سن

سنین الیندن یئمک ایستیرم

منیم آغریما سن آغلاییردین

گؤز یاشلارینی سیلمک ایستیرم

اوشاقلیقدا من دییه بیلمه دیم

«سنی سئویرم» دئمک ایستیرم

گؤزلریم یولدا هاردا قالمیسان ؟

سنی آنا جان گؤرمک ایستیرم

سنسیز آی آنا گولمور ئورگیم

تکجه سنینله گولمک ایستیرم

داریخیرام من غریب دونیادا

سنین یانینا گلمک ایستیرم

آللاه شاهیددی آی گوزل آنا

سنی گؤرمه یه اؤلمک ایستیرم

شاعیر : وحید شکرزاده

آنالار گونو بوتون گوزل یوردوموزون آنالارینا موبارک

بو شعری بوتون آللاهین یانینا گئدن آنالارا

و خصوصا اؤز گؤزل آناما تقدیم ائدیرم

( آللاه روحونی شاد ائلسین )

یاز قلم نازلی آنام دان

یاز قلم نازلی آنام دان ، کی قُولوم یازماغا قاخمیر

او گؤزل مهریبانیم دان ، کی الیم دای اونا چاتمیر

یازگینان تایسیز آنام دان ، او قارا تئللی مارال دان

تا کی بو طبعیم اویانسین ، کی اونون لاییقی یازمیر

یازگینان گؤیچک آنام دان ، او شیرین لای لاییسین دان

بیه بولسون کی بو گؤزلر ، باشقا بیر لای لایا یاتمیر

او کی گئتدی ائله بیر گولزاریمین باغبانی گئتدی

سولدی قلبیمده کی گوللر ، اونا بیر گول داحا آشمیر

گلیر او هی یوخوما سویلویوری آغلاما بسدی

اُولموری آی آنا جانیم بو کؤنول دای سؤزه باخمیر

دییللر آهو باخیشلی او آنان گؤیلره اوشدی

سن کی من سیز گئتمزییدین ، بو منیم بینیمه باتمیر

شاعیر : وحید شکرزاده

جان سنه قوربان دی آنا

هئچ کیمی من ایسته میرم ، گل ئورگیم قان دی آنا

هارداسان آخر بورا گل ، جان سنه قورباندی آنا

سن اُو زامان هی دارییاردین باشیمی ایندی ولی

بیر چک الین ساچلاریما گؤر نه پریشان دی آنا

سعی ائدیرم گؤرمه سین هئچ کس گؤزومون یاشلارینی

نینییم اُولمور بولونور گؤزلریم گریان دی آنا

دوز اُو زامان دان کی سنی آلدی الیم دن بو جاهان

هر گونومون تک جه ایشی ناله و افغان دی آنا

آیریلیقین دا بو کونول اُوت توتوب آخر یانیری

بیر منی آل سن قوجاغان کی منه درمان دی آنا

چوخلی سنی من سئویرم بسدی داحا هئچ دئمیرم

گؤر نه سن آخر کی یئرین جنت و ریضوان دی آنا

شاعیر : وحید شکرزاده

آنالار گونون بوتون آنالارا تبریک دییرم