Mövzu: Cəhənnəmdə bitən gül...

Ancaq halım olmadan bu söysəli latincə döndərməgə bağışlayın...daha qocalıqdan xəbər verir...

فلکین قانلئ الینده ن بیر آتئلمئش یئره اندی،
بیر فلاکت آنانئن جان شیره سینده ن سؤدؤن امدی،
بوللو نیسگیل شله سین چیگنینه آلدئ،
تای تؤشؤنده ن دالئ قالدئ،
سارئ گؤل میثلی سارالدئ،
گؤنؤ تک باغرئ قارالدئ،
درد الینده ن زارا گلدی،
گؤنؤ گؤنده ن قارا گلدی،
خان چوبانسیز سئله تاپشئرسئن ئؤزؤن،یوردوموزا بیر سارا گلدی،
بیر وفاسئز یار الینده ن یارا گلمز سانا گلدی،
بیر یازئق قئز،جان الینده ن جانا گلمز جانا گلدی،
کئچه جکده"الموت"دامنه سینده ن بورایا درمانا گلدی،
بیر آدامسئز "سؤرؤ" آدلئ،
الی باغلئ،
دیلی باغلی!

"سؤرؤ"کیمدیر؟
سؤرؤ بیر گؤل دؤ جهننمده بیتیبدیر،
سؤرؤ بیر دامجئ دئ گؤزده ن آخاراق اؤزده ایتیبدیر،
سؤرؤ،یول یولچوسودور،ایری ده یوخ،دؤزده ایتیبدیر،
سؤرؤ،بیر مرثیه دیر اوخشایاراق سؤزده ایتیبدیر،
او کؤنؤل لرده کی ایتمیش دی ازلده ن،اودو گؤزده ن ده ایتیبدیر،
سؤرؤ بیر گؤزلری باغلئ،
اؤزؤ داغلئ سؤزؤ داغلئ،
اولوب هاردان هارا باغلئ!

بوشلایئب دوغما دیارئن،اوموب البته یارئندان،
ال اؤزؤبدؤر هر نه وارئندان،
قورخمایئب شهریمیزین قئشدا آمانسئز بورانئندان،
نه قارئندان،
گزیر آواره تاپا یاندئرئجئ دردینه چاره،تاپا بیلمیر،
چوخ سئویر عشقی باشئندان آتا،آمما آتا بیلمیر،
اووا باخ اووچئ دالئنجا قاچئر،آمما چاتا بیلمیر،
ایش دؤنؤب،لیلی دؤشؤب چؤللره مجنون سوراغئندا،
شیرین الده تئشه،داغ پارچالایئر،فرهاد اوتورموش اوتاغئندا،
تئشنه لب قو نئجه گؤر جان وئری دریا قئراغئندا،
گؤزده حسرت یئرینی خوشلایئب ایبهام دوداغئندا،
وارلئغئن صون اثری آز قالئر ایتسین یاناغئندا،
سانکی بیر کؤزدؤ بؤرؤنمؤش کؤله وارلئق اوجاغئندا،
کؤزه ریر پیلته کیمین یاغ تؤکه نیب دیر چیراغئندا،
بوی آتیر رنج باغئندا،
قوجالئر گنج چاغئندا،
بیر آدامسئز،سؤرؤ آدلئ،
الی باغلی،
دیلی باغلئ!

سؤرؤ جان!
اومما فلک ده ن،فلکین یوخدو وفاسی،
نه قدر یوخدو وفاسی،اوقَدَر چوخدو جفاسی،
کؤهنه رقّاصه کیمین هر کسه بیر جؤر دؤ اداسی،
او آیاقدان دؤشه نی،ایستیر آیاقدان سالان اولسون،
او تالانمیش لارئ ایستیر گؤنؤ گؤنده ن تالان اولسون،
او آتئلمئشلاری ایستیر هامئدان چوخ آتان اولسون،
او ساتئلمئشلاری ایستیر قول ائده رکن ساتان اولسون،
نئیله مک قورقو بوجوردور،
فلکین نظمی ازلده ن اولوب اضدادئنا باغلئ،
قاراسئز آغلار اولانماز،
دره سیز داغلار اولانماز،
اولو سوز ساغلار اولانماز،
گئره ک هر بیر گؤزه له بیر دانا چیرکین ده یارانسئن،
بیری انسین یئره گؤیده ن،بیر عرشه اوجالانسئن،
بیری چالسئن ال ایاق غم دنیزینده،بیری ساحیلده سئوینج ایله دایانسئن،
بیری ذیللت پالازئن باشه چئکیب یاتسادا آنجاق،بیری نین بختی اویانسئن،
بیری قؤیلانسادا نعمت لره یئر سیز،بیری ده قانه بویانسئن،
آی آدامسئز سؤرؤ آدلئ،
ساچلارئندان دارا باغلئ!

نئیله مه ک ایش بئله گلمیش،
چور گلنده گؤله گلمیش،
فلکین ایری کامانئندا اولان اوخ آتئلاندا دؤزه دگمیش،
دیلسیزین باغرئنی دلمیش،
ایری قالمئش،دؤزؤ اگمیش،
اونو خوشلار بو فلک،
ائل ساراسئن سئللر آپارسئن،
بؤلبؤل حسرت چکه رک گؤل ثمرین یئللر آپارسئن،
قِیسی چؤللرده قویوب لیلی نی محمیللر آپارسئن،
خسرووی شیرین ایله ن ال اله وئرسئن،فرهادئن قامتین اگسین،
باخاراق چرخ زامان نشئه یه گلسین،
کئفه دولسون،
سؤرؤ لر سولسادا سولسون،
بیری باش یولسادا یولسون،
سئسقا بیر اولدوز اگر اولماسا اولدوزلار ایچینده،بو سما ظؤلمته باتماز،
داش آتان،کؤل باشئنی قویموش،داشئنئ ئؤزگه یه آتماز،
سن یئتئش سون هدفه اوندا فلک مقصده چاتماز،
داها افسانه یاراتماز،
سؤرؤ،ای باشئ بلالئ،
زامانئن قانلئ غزالئ،

سؤرؤ بیر قوشدؤ خزان آیری سالئبدئر یوواسئندان،
ال اؤزؤبدؤر آتاسئندان،
جؤجه دیر حیف اولا سؤد گؤرمه ییب اصلا آناسئندان،
او زؤلیخا گیبی یوسیف اییین آلمیر لیباسئندان،
بو نا قانع دی تنففؤس ائله ییر یار هاواسئندان،
درد وئره ن درده سالئب آمما خبر یوخ داواسئندان،
آغلایئب سیتقایاراق بهره آپارمئر دوعاسئندان،
او بیر آئینه دی رسّام چئکیب اؤستؤنه زنگار،
اوندا یوخ قدرت گفتار،
اؤزؤ چیرکین دیلی بیمار،
گنج وقتینده دل آزار،
گؤره سن کیمدی خطاکار،
گؤره سن کیم دی خطاکار!

عاصیم اردبیل لی

saytimizda qocalar(+memmed bey) choxalir

zerafet edirem,sheir gozeldi, ellriz agrimasin Ashiq bey

Denə nədənmiş təkcə memmed bəy Bəndən "Türkcə deyişmə" tapikində deyişir,on içün deyərlər qocanın halın qoca bilər

Sizində əlləriniz ağrımasın...